Манийрин кирам зари

Чна Бакуда кIелзавай чIавар тир. Дернегуьлда, чи ксуркIвале студентри литературадин кIватIал тешкилнавай. Чун вацра садра чи утагъдиз кIватI жедай, цIийи эсерар кIелдай, кьечIедай, кьабул хьайибур «Кьулан вацI»тIвар алай цлан газетдиз ягъадай… И жегьилрин арада са гада авай, ада азербайжан чIалал кхьидай. Адакай гила 60-йисавай рехи кас хьанва, ам са шумуд манидин кирам, яцIу са улубдин автор хьанва.

Эхь, а касдин тIвар Сейидмет, бубадин тIвар Низамеддин, фамилияни Зуьлфуькъаров я. Ам 1954-йисуз КцIар райондин ГуьндуьзкIеле хуьре дидедиз хьана. Хуьруьн мектеб акьалтIарай жегьилди 1970-1974-йисара В.И.Ленинан тIварунихъ галай АПИ-да муаллимвал кIелна. Саки 40 йис я, хайи хуьре аялриз тарсар гузва, абурун чирвилер хкажзава.

«Самури» лакIаб кьабулай шаирдин сифте шиирар институтдин газетда,»Къизил Къусар», «Азербайжан генжлери» газетра чап хьанай. Сейидметан пуд шиир 1983-йисуз акъатай «Бахтавар чил» улубдик акатнава:

 

Эй зи жегьил рикI. 

Дуьня аламат,

Акъвазмир вун икI. 

Уьмуьр аманат. 

Жув герекзавай 

Женг герек я, женг 

Инсанриз килиг… 

Амай кьван такьат. 

1984-йисуз лезги эстрададиз «Шагьдагъ» тIвар алай ВИА атана акъатна. Адан регьбер Сейидметан гъвечIи стха Видади хьунихъ галаз сад хьиз, шаирдин туькIуьрунар манидин жанрдал элкъвена. Чара-чара йисара С.Самуриди 16 манидиз гафар кхьена. «Шагьдагъди» лагьайтIа, абур халкьдин мярекатрал, фестивалра, мел-мехъеррихъ вини дережада чав агакьарна. Ингье, ансамблдин гимндиз элкъвей «Шагьдагъ» тIвар алай манидай са куплет:

Ширин я, гьакI ширин я,

Мани-аваз ширин я.

Шагьдагълариз килигна

«Лезгинкадал» илигна,

Акъат кьуьлиз, жегьилар!

Зи дустунихъ чапдай акъуднавай са улуб ава: «Шагьдагъдин авазар». 2011-йисуз Магьач­- къала шегьерда, чи рикI алай шаир Зуьлфуькъар Къафланован редакторвилик кваз басма хьанвай и улубди чна винидихъ лагьанвай гафар, яни С.Самуридин туькIуьрунрин диапазон гегьенш тирдан шагьидвалзава. Килиг, улубдин редакторди Сейидметан гьакъинда вуч кхьизватIа: «Гьар са инсандиз вичиз хас тир къилих авай хьиз, гьар са къилих авай касдихъни вичиз хас тир рехъ ава: Уьмуьрдин рехъ! Сейидмет Самури, лагьайтIа, гъиле къелем кьурдалай къениндалди вичин шиирра Ватандин ашкъидикай, халкьдин рикIиз чими хайи чилин гуьрчеквилерикай, руьгьдин хцивиликайни михьивиликай тесниф- завай халис шаир я.»

И мукьвара хайидалай инихъ 60 йис жезвай зи дуст Сейидмет Самуридиз чандин сагъвал, фикиррин хцивални экуьвал тIалабуналди, рикIин сидкьидай чими саламар ракъурзава.

 

В. Муьшкуьрви,
зари

Добавить комментарий

Ваш адрес email не будет опубликован.