Тахсир квачир инсанар кьадай I937 лагьай йисуз зи буба Мегьман кьуна тухудайла ирид йис хьанвай зи вилериз акур мусибат, дяведин йисара гишила кьейи мийитар акур, хизан чи хайи хуьряй акъудай вахт, тахсир квачир зи диде Ханселем судди кар атIана къазаматда тваз кан хьайи йугъ ва мад мукьвал ва чара инсанрин мусибатар, четинвилер, азабар акур, яшар 85-ав агакьзавай зун уьмуьрдин сирерикай хабар авайди хьиз ксанвайди тир. АкI тушир кьван. Уьмуьрдихъ заз такур, чин тийир, сирерни авайди тир кьван. Сирерикай садни заз зи кIвалин дестек, зи эдеб-абур, зи лувар, 52 йисуз санал чан-чан лугьуз уьмуьр кьиле тухвай Сариханум свас кьена кан хьун тир. Эхь, эхь кьена кан хьун. Уьмуьрдин эхир йикъара сагъ тежедай начагъвили кьуна месе гьатнавай зи сваса чIугвазвай азабар акурла кьилиз атай фикирар…

Июлдин вацран муьжуьдаз экуьн сят вадаз зи чан-жигер, зи вар-девлет а дуьнядиз фейила заз адан бурма чIарариз цIийиз бурма хтайди хьтин, чина тIимил хъвер хьанвай хьтин, эрчи гъил са тIимилкьан вине кьунвай Сариханум сусан мейит акуна…
Жуваз чидай дуаяр кIелна, вири кьейибурухъ галаз зи сусазни рагьметар гъана….
Дуьнедиз атанвай вири инсанриз кьисмет жезвай ажал…
Бес вун вучиз икьван залан ятIа?…
«Закай яргъаз катай зи свас,
Зи луварар кьатIай зи свас….»
Мад гуьгъ хтанач. Жуваз мад кхьин хъийидач лагьана гаф гана. Сентябрдин 22-аз буба кьилел аламачиз чун чIехи авуна хвейи, диде никIе къуьл кIватIиз, хармандал юг гатаз авайла чаз дидевал авур чIехи вах Чимназни завай къакъатайла за а цIарарин гуьгъ хкана.
Рагьмет хьурай чпиз!

Закай яргъаз катай зи свас,
Зи луварар кьатIай зи свас.
Вучиз на зун туна бес тек?
Кьуьзуь кьиляй хьана гьелек.
Вун амачиз зелил хьанва,
Захъ кумайди са гъил хьанва.
Са гъиляй ван акъатзамач,
Чидайбурни агатзамач.
Зи вах Чимназ ви патав гва,
Куь хесетар кьадайбур тир.
КIвализ атай гьар бендедин,
РикIе шадвал твадайбур тир.
Кьисмет хьурай женнетдин кIвал,
Зи багърияр, зи масанбур.
И дуьняда чIугур кьван тIал,
Бес тушни квез руьгь хъсанбур.
Рак гатадай амач са кас,
Акъатзавач рикIевай яс.
Хутах зунни свас, ви патав,
Чун къвал-къвала аваз хьурай.
Зи кIарабра гьатрай ялав,
Чи руьгьериз акваз хьурай.
Рагьмет хьурай!
Рагьмет хьурай!

* * *
Тик гуьнедай гьикI экъечIда, вун галачирла,
Зун кьуьлуьник гьикI экечIда, вун авачирла.

Мегъуьн тарцин хилер хьтин гъилер авай захъ,
ГьикI хкажин, гила гъилер кьеж кумачирла.

Сурар авай яргъал мензил таниш тушир гьич,
Гьанани за гелер тазва, вун алачирла.

Ви сурет заз аманеви, зи абурдин диб,
Аян жеда рикIиз шикил зав гумачирла.

Пелеш хьанва Асеф Мегьман, амма сабурдив,
Эвелан хьиз кьил тик кьазва, вун амачирла.

Асеф Мегьман