Илясов Камалдин Албертан хва 1991 йисан 30 мартдиз Хив райондин Кашан хуьре дидедиз хьана. Алай аямда Питерда уьмуьрзавай жегьилди аял чIавалай хайи чIалал шиирар кхьизва. Заз интернетдай чидай жегьилдин шиирар сифте яз «АЛАМ”да чап жезва. Чна адаз чIехи гъуцаривай агалкьунар тIалабзава!

РУШ

Вахъ вил галаз акваз тежез,
Зи рикI къене дакIвазва руш,
Йиферизни ахвар текъвез,
Кьуд пад вун хьиз аквазва руш.

Шикил вилик, хьана пашман,
Ашкъидин цIу куз ава руш.
Жагъин тийиз рикIин дарман,
Вун такуна хъухъвазва руш.

Уьмуьр физва шад югъ такваз,
Зи жегьил чан, бес чIух тушни?
Хвеши тир заз, вун патав гваз,
Къакъатиз зи язух тушни?

Залан кIвалах хьана хьи заз,
Кьисмeт хьунихъ умуд амач.
Алцурарна, хъуьрез акваз
Заз вун хьтин харуд амач.

Хьана лугьуз масадаз яр,
Мад вун акван хуш жедач руш.
Зазни садра, хъуьреди рагъ.
Яр авачиз нуш жедач руш.

Жегьил шаирар сифте яз такъдимзавайди “Марвар” литератур кIватIалдин кьил Эйваз Гуьлалийрин я.