Ансамблдин юбилей

Кьве йисалай гзаф я Бакуда лезги культурадин журнал “Алам” акъатиз. Журналдин кьилин редактор чи сейли журналист Къурбаналийрин Камран я. И кьве йисан къене журналди Бакуда “МАРВАР” литературадин межлис кардик кутуна, поэзиядинни манийрин нянияр кьиле тухвана, манидарар патал “Лира” премия тешкилна, кьуд улуб акъудна. Лугьуз жеда, журналди чи культура патал хийирлу крар ийизва.
Мукьвара “АЛАМ” журнал кьиле аваз, “Самур” культурадин меркездин куьмекдалди Бакуда лап чIехи мярекат кьиле тухвана. Бакудин лап чIехи театррикай сада, Жегьил Тамашдайбурун Театрда “Шагьдагъ” ВИА-дин 30 йисан юбилей къейдна. Мярекатдал сифте гаф академик, Азербайжан Гьукуматдин лап чIехи награда тир “Шуьгьрет” ордендин иеси, чаз хъсандиз чидай Асеф Мегьманан стха Камал Абдуллаева лагьана.

“Шагьдагъ” ансамбль 1984-йисуз жегьил композитор Видади Зуьлфуькъарова КцIар райондин ГуьндуьзкIеле хуьруьн клубда тешкилнай. 30 йисан къене ансамблдин авазрин ван чи сегьнейрай, мел-мехъеррикай атана, 1987-йисуз Вирисоюздин, 1988-йисуз “Дуствал”, 1991-йисуз “Шарвили” фестивалрин лауреат хьана, “халкьдин коллектив” тIвар къачуна, къени сегьнеда ама.
Межлисда чи баркаллу инсанри режиссер, Азербайжандин халкьдин артист, “Шуьгьрет” ордендин сагьиб, профессор, Дагъустандин Ахцегь райондай тир Женнет Салимова, Азербайжандин Милли Межлисдин депутат Азер Бадамова, Азербайжан-Дагъустан Дуствилин Жемийятдин президент Абдулгъафар Исакьович Агьмедова, шаир Сеидмет Самуриди, “Азербайжандин Пайдах” кьве ордендин сагьиб, полковник Шаир Рамалданова ансамблдиз, атанвайбуруз чими келимаяр лагьана, ихьтин межлисрин хийирдикай рахана. Мярекатдал чи гзаф манидарри манияр лагьана. Решид Хидиров, Явер Шалбузов, Элман Амирханов, Магьира Ширинова, Финяз Гьажиметов, Дагъустандин лайихлу артист Фаризат Зейналова, Руслан Пирвердиев, Сархан Шагьдагъви, Бехтияр Саидов, Адил Сафаров, Азербайжандинни Дагъустандин лайихлу артист, хрусталдин кларнетдин сагьиб Шербет Рзакъулиев атанвайбуру хушдаказ кьабулна, зурба алхишрив, цуькверив рекье туна. Межлисдин лап иер легьзе цIуд йисан яшда авай са лезги аялдин — Исмаил Саидован рахунар хьана. Бакуда чIехи жезвай аялдин сифте гаф, вичин дидедиз бахшнавай:-“Чан диде, ви чан сагърай заз лезги чIал, фольклор, кIел-кхьин чирай.” Ахпа ада Билал Адилован “Дидед чIал” шиир кIелна.
Юбилей чи “Левитан”, Бакудин Гьукуматдин радиодин лезги передачайрин редактор Руслан Шейдаева, Къубада авай пединститутдин студентка Лезгина Зуьлфуькъаровади пара устадвилелди кьиле тухвана. ГьакIни, концертдиз чи бажарагълу зари Билал Адилова, сейли журналист Къурбаналийрин Камрана кхьенвай сценарийдин бегьемвили, чи кIани, чIехи камалэгьли Асеф Мегьманан мубаракдин чарчи мадни хъсан ранг гана.
Межлисдин эхирдай журналдин кьилин редактор Камран муаллимди виридаз вичин разивал, хвешивал малумарна, чи музыка вилик тухунин карда авай агалкьунриз килигна, “Шагьдагъ” ансамблдин регьбер Видади Зуьлфуькъароваз, Шербет Рзакъулиеваз, Фаризат Зейналовадиз, Элман Амирхановаз журналдин премияр, дипломар, машгьур художник Дарвин Велибегован шикилар пишкешна.

Эйваз Гуьлалиев
Лезги газет

Добавить комментарий

Ваш адрес email не будет опубликован.