Халкьдиз кани сеняткар

41Насир Шагьмурадова жуьреба жанрайрин 400-дав агакьна манийрин автор я. Абурун арада инсандин руьгьдин деринриз таъсирзавай Фахредин Уружеван чIалариз теснифнавай “Нарын-Къала”, Абдулкъадир Сайдумован — “Шадвал”, “Беневша”; Шихнесир Къафланован — “Ава жал”, Г. Шугаеван — “Эллина”, “Ирид булахар”, Азиз Мирзебегован — “Аллагьди вун халкьнатIа гьикI”, “Вал дуьшуьш хьайи чIавуз”, “Зун гьи чIалал вав рахан, яр”, “Вун зи рикIяй акъатдач”, “Керем хьиз кайитIани”, “Дербент”, “Чи ватан”, “Мубарак” ва маса шаиррин чIалариз теснифнавай гьаваяр ава.

Насир Шагьмурадова вичин хсуси гьавайрик алай аямда Дагъустандин, Россиядин хару сенятдиз хас тир рангар, везинар кутазва. Лирикадин хъуьтуьл, чи халкьдиз мукьва гьаваяр, чи гьар йикъан уьмуьрдин гьакъикъатдикайни муьгьуьббатдикай, халкьарин дуствиликай, чи хуьрерикай, иллаки Абил Межидован чIалариз теснифнавай “Дидедиз” мани, баркаван чили марф хьиз, чи руьгьди кужумзава. Кеспидилай юргъун хьана хтайлани, рикI дар хьанвайлани, шад межлисдани халкьди адан авазрихъ еке хушвилелди яб акалзава. Ада лезги музыкадин руьгьдиз, къилихриз мукьва тир гьаваяр туькIуьрзава, музыкадин гьа и терефриз жаваб гузвай чIаларни хкязава. Пешекарвилин устадвал аваз ада халкьдин алатрин оркестр тешкилнава, адан бедии регьбер ва дирижерни вич я. 

Дагьустан Республикадин телерадиодин фондуна гьатнавай адан манийрин кьадар 30-далай алатна. Насир Бабаевича студентриз, вич муаллим яз, милли музыкадихъ, шаиррин чIаларихъ галаз таниш жедай мумкинвилер гузва. Адахъ пешекарвилин устадвал аваз халкьдин алатрин оркестр патал кхьенвай са жерге авазарни ава. Ада лезгийрин, табасаранрин, азербайжанвийрин театрра эцигзавай тамашайризни музыка теснифзава.
Манийрилай гъейри Насир Шагьмурадова музыкадин маса жанрайрани кIвалахзава. Ада, халкьдин музыкадин иер чешнеяр жагъуриз, абур пропаганда ийизва, гьам пешекар артистриз, кьавалчийриз вичелай алакьдай гьар жуьредин куьмекар гузва. Адан туькIуьрунар серинвал, гъам, хажалат, дарихвал квадардайбур я, адан авазра садвилин, шадвилин, азадвилин, дуствилин, Ватан канхьунин гьиссер ава. Чебни ажайиб везинлувал, милливал, ширинвал авайбур я. Насир Шагьмурадова вичин эсерра уьмуьрдин гьакъикъат къалурзава.
Республикадин музыкадин искусство вилик тухунин кардик еке пай кутунай Насир Шагьмурадоваз “Дагъустан Республикадин искусствойрин лайихлу деятел” лагьай гьуьрметдин тIвар ганва, туькIуьрунарин хейлин конкурсрин, фестивалрин лауреат я.
Насир Шагьмурадов туькIуьрунарин чагъинда ава, жегьил вахтара хьиз, исятдани адан рикI цIийи везинрив ацIанва ва чна адавай гьиссер михьи, инсандив фикириз гудай, ахлакь тербиядик кутадай цIийи авазар виливди хуьзва.
Аллагьди адаз руьгьдин къуватар гурай, адан хизанда бахт — берекат артух хьурай, дуьняда ислягьвал хьана, чи милли искусство вилик тухунин кардал гуьлвал артух хьурай!

Майина Абдулмуталибова,
гьевескар композитор,
РФ-дин Журналистрин КIватIалдин член

Добавить комментарий

Ваш адрес email не будет опубликован. Обязательные поля помечены *