Маса дуьнядиз фена, дуст Хийирбег

43Алатай, 2014- лагьай йисан эхирмижи йикъара рикIик къалабулух квай, Хийирбег акуна канз, адахъ галаз ихтилат-хабар ийиз, чи жегьил вахтар рикIел хкиз. Гьелбетда, эхиримжи йисара чна санал кIвалахзавай, гьар юкъуз тахьайтIани, гьафтеда 2-3 сеферда чун сад-садаз аквазвай. ГьикI аквазвай? 

– Салам, Мегьамед!
– Хийирар, Хийирбег!
– ГьикI я кIвалахар, кIвалар, хзанар?
– Алай вахтуниз килигайла хъсан я, Хийирбег дуст. Вун вуч гьал я?
– Зунни хъсан я.
— Хъсан хьурай, дуст.
– Мус чун, мажал аваз, сад-садал гьалтда?
– Тамашин, дуст. Акурай чаз гьахьтин югъни,- зарафатдалди за адаз лугьудай.
Ахкунач чун мажалдалди сад-садаз. Чун сифте гьалтна 1955 йисуз. А вахтуна чун Магьачкъаладин музучилищедиз кIелиз гьахьнавай. Зун, Хийирбек, Сейфулагь Максимов гзаф йисара санал хьанай. А йисара чун мехъеррикни физвай, ресторанрани музыка язавай. За чIагъан, Сейфулагьа кларнет, Хийирбега далдамни язавай, маниярни лугьузвай.
Дирижер-хордин отделенияда кIелзавай Хийирбегаз гзаф иер ван авай. Сад лагьай сеферда адан сесинин иервал чаз училишда гьазурнавай конценрта ван хьана. Ада гзаф устадвилелди Т.Кулиеван муьгьуьббатдикай мани тамамарна. Идалай кьулухъ Хийирбеган тIвар машгьур хьана. Адавай гьамиша мани лугьуз тIалабдай.
Гьелбетда, вири яб гузвай инсанриз Хийирбега лугьузвай манияр пара хуш жезвай. Училище акьалтIарайдалай кьулухъ чи уьмуьрдин рекьер чара хьана. ЯтIани чун гьамиша кIеви дустар яз амукьна. Хийирбега гзаф йисара Дагъустандин Гьукуматдин Кьуьлерини Манийрин ансамблда устадвилелди кIвалахна. Эхирмижи йисара Хийирбега Дагпедуниверситетдин доцентвиле, опера театрдин хордин артиствилени кIвалахзавай. Вири кIвалах авур чкайра Хийирбега вичин алакьунар, устадвал, пешедал рикI алайвал къалурна. За гьамиша зи дустуниз лугьуз хьана:
— Хийирбег, вучиз ихьтин сес аваз, вуна аудиозапис ийизвач, чIехи концертра манияр лугьузвач?
Эхирни 2001 -йисуз жуван 60-йисан концертдиз гьазурвилердайла, дуст Хийирбегаз за са мани кхьена. Арбен Къардашан гафариз кхьенвай и манидиз за «Дидедикай баллада» тIвар гана. Хийирбегазни мани гзаф хуш хьана.
3 ноябрдиз Магьачкъаладавай урус театрдин чIехи залда и маниди премера хьана. За мукьвал-мукьвал концертда тамамарзавай и манидин видеозаписдиз килигзава. Дуст Хийирбек сегьнеда микрофондин велик, зун роялдихъ, симфониядин оркестр сегьнеда. Сад лагьай музыкадин сесерилай, тамашачийри са ван-сесни авачиз яб гузва. Манидилай кьулухъ тамашачиярин капар гзаф гурдакваз давам жезвай.
Хийирбег чидай инсанрин рикIера вини бажарагъ авай, гзаф рикI михьи, пара дугъри кас яз гьамиша амукьда.
Аллагьди ваз рагьмет авурай!

Мегьамед Гьуьсейнов,
композитор

Добавить комментарий

Ваш адрес email не будет опубликован.