Майдин 29-аз «Алам» журналдин, «Марвар» литератур кIватIалдин, гьакIни 1992-йисуз акъатай «Самур» газетдинни пун кутурбурукай сад тир зари Билал Адилован 50-йис тамам хьанва. Каркам Далагьан сихилдикай тир зари КцIар райондин СтIуррин хуьре дидедиз хьанва. Юкьван мектеб СтIура, Азербайжандин Девлетдин Мадаратдин Институтни Бакуда яру дипломдивди акьалтрайдалай кьулухъ са тIимил чIавуз КцIара бухгалтервиле кIвалахнава. Баку шегьерда уьмуьрзава. Лезги ва урус чIаларал акъатнавай «43», Болгарияда гьа чIалал акъатнавай «Канивилин есирда», дуьнедин классикрин лезги чIалаз элкъуьнавай эсеррикай мали тир «Капавай гъетер» улубрин кирамдин эсерар гьакIни жуьреба алманахрани гьатнава.
Кьве рушанни са хцин бубадиз за чи коллективдин тIварцелай юбилей мубаракзава ва ЧIехи гъуцаривай чандин сагъвилив, рикIин шадвилив вири мурадар кьилиз акъатун тIалабзава!
Зи руьгь..
Ваз акурди тек са — зи руьгьдал тIапIар…
КьатIанач дердерин жигъирар ина.
Ам патал хазина — рагъ къведай дакIар,
За вуч хиялзава, вун куь дердина?
КукIушар канзавач заз шаирвилин,
РикIин сузаяр я кхьизвай цIарар…
Килиг, агакьнава рехивал кьилин,-
КичIевал яни заз саврухар, гарар?
Зи руьгь — сирерикай мугдай хуьшрекан,
Зи руьгь — хважамжам, ава гьар са нав!
Садран къайи жедач ргазвай вулкан,-
ЦIаяри алугда — агатмир патав…
Зун азад са лекь я — сувун романтик-
Белки им бахт я са, белкини жаза…
Кутаз канивилин байихар рикIик,
Гьиссерин алемда сирнавзава за…
05.02.2017 г.
Ватан рикIеваз…
Кани я заз и чуьл, и дагъ, и дере,
И чилел акъатна зи аял йисар,
Хиялриз фенай зун и вацIун кьере,
Мурадрик и чили кутунай лувар.
Нубатда хьана зун суван ценера,
Марфадиз, цифериз килиг тавуна.
Хипер, малар хвена дерин хинера,
Саврухрин къаяри, аязди кьуна.
Гьикьван векь ягъана кьакьан сувара,
За къилав гудайла гъил-тIуб атIана…
КьуньчIуьк ктаб жедай верци чIавара,
Зегьмет ина гьисна, уьмуьр кьатIана.
Чими къулан патав кIелиз ацукьна,
Лемпедал акъудна за хъуьтIуьн йифер…
Ина рикIе гьатна, рикIе амукьна,
Вилера ашкъ авай са рушан кифер.
Кани я инсанрин хуш тир ниятар,
Легьзе, лекь къарагъдай дагъдин синелай.
Кимел ихтилатиз фейи сятар,
Алудиз жедани вавай рикIелай?
Кани я таватар, гуьлуьт храдай,
Рагъ гуз-гуз ацукьна хьрабдин кIане,
Аял, дидедин рехъ, тIулутI чрадай,
Гуьзетиз акъваздай хьар галай гъене…
Мукьвал я, лап мукьвал и пад цавариз,
Гъетерин рапIрапIин –суьгьурдин алем!
Хайи чил къвезва зи фад –фад ахвариз,
И ватан рикIеваз ягъазва къелем!
Кьисметдин савкьват…
Цав гьикьван экуь я, михьи я гьава,
Чи кьилел варз ала битав ацIанвай,
Зунни цаваралла — лув акатнава,-
Къе вун ахкуналди, умуд атIанвай.
Амма жузамир гьикI хьана ви гьалар,
Зун такур варцара, залай яргъара…
Хкажмир, минет хьуй, чандавай тIалар,
Сир хьана амукьрай кхьей цIарара…
Ванармир вуна заз, мад верци гафар,
«Види я, зун види, чIалахъ хьухь» — лугьуз,
Мад рикIел хкана гуьруьшрин чIавар,
Тамир зун цIаяра гьакI кузни –хъухъуз.
Заз чизва, ваз чизва, виридаз аян-
Чи рекьер чара я, руьгь сад ятIани,
Са рахун чун патал — чIехи эрзиман,
Вилерал нагъв ала, рикI шад ятIани.
…Цав гьикьван экуь я, гьава гьикI таза,
Чи кьилел варз ала битав ацIанвай…
Ви гъил зи гъилева, кIевиз кьунва за,
Легьзедин савкьват хьиз, кьисметди ганвай…
РикIиз…
ПIузарриз хъвер гана, садаз чир тийиз
Накъвар селлер хьана, къеняй авахьиз,
Булахар саф тир ви — илгьам алахьиз…
Ятар бул ятIани, кьуразвани вун,
Часпаррин къеневаз, цIразвани вун?
Бахтарин гуьгъуьна галтугарна зун
Галудна, и чандик кутуна зурзун,
Амачни захъ галаз жузун – качузун?
Гъамари, нехиш тваз, хразвани вун,
Часпаррин къеневаз, цIразвани вун?
Гьарда вичиз чидай са затI акална,
Ваз нефес къвез тунач, дакIар агална,
КуьцIенвай тандикай кIвалакI акъална,
ЦIай квачиз ифена, чразвани вун,
Часпаррин къеневаз, цIразвани вун?
Кьуд патахъ килигиз хвенани абур?
Са кIвач вилик хьана валай ви сабур,
Жуваз жув такан яз — кьена такабур,
Гила пашманвилив ргазвани вун,
Часпаррин къеневаз, цIразвани вун?