20 йис сегьнеда

Майдин 23-аз Дербентда Лезги театрдин дараматда чи шира манидар Фаризат Зейналовадин «Къад йис сегьнеда» тIвар алаз туькIуьрунрин няни кьиле фена. Мярекатдай чазни эвернавай, «АЛАМдин» тIварцелай иштирак авун зи, гьакIни чи иер манидар Магьире Шириновадин хиве гьатна. Зун геж тахьана мярекатдив агакьна. Инал зун зи дуст, жегьил шаир Ахцегь Сулеймана вилив хуьзвай. Чавай элдин гъиляй залдиз гьахьиз хьаначир. Ина цавай аватай раб чилел агакьдачир жед. Чи чкаярни кьунвай. «Чан бала, зун къарагъар мийир..» лагьай лезги бадедин хатур ханачир мад. Театрдин чIехи гъенни ацIанвай.
Чун багърийри чка авачиз тунач. Амма са кьадар зун зи дуст Ашукь Шемширахъ, гьакIни чи манидаррихъ, артистрихъ галаз пердедин къулухъ хьана. Заз и кар залан тушир. Заз цIийи дуьняни аквазвай:-пердедин къулухъ пад, артистар, ишарайрив рахунар, гата-галтуг, харувилер, … Гьар вуч ятIани иер, рикIиз чими акунар тир. Зун залдани, сегьнеда пара хьайиди тир, амма пердедилай а пата сифте тир. Иниз вичин иервал аватIани, аял чIавариз чинеба чанда илис хьанвай актер хьун хьтин мурад кьиле тефена хъсан хьайи хьиз хьанай заз.
Межлисдин иервили, бегьемвили зун рамнавай. Ина вужар авачир?! Чи иер манидарар, театрдин артистар, зарияр, алимар, тележурналистар, … сая халкь.
Вирида чипин гаф лугьузвай, — сада алхишрив, сада шиирдив, сада манидив, сада цуькверив. Има манидин сувар, хайи элдин канивал тир.
Са шумуд сятда давам хьайи межлисда Фаризат вахан иштираквал аваз “КьепIир Айисат”, “Периханум”, “Йифен кьулариз тарашун”, “ЦIарубегни Харубег”, “Вун я зи диде” ва маса тамашайрай чIукар къалурна, ада вичи гьакIни РД-дин халкьдин артист Т.Мамедова, РД-дин лайих артистар Р. Пирвердиева, О.Меликова, ашукьар Шемшира ва Айдуна манияр лагьана.
Ихьтин зурба межлисда иштирак авун, гаф лугьун пара хуш тир заз. Зун багърийрин арада авай. Зи гафунилай кьулухъ Магьира Шириновадини вичин гафар манийралди лагьана. Мярекатдилай ахпа кьуланфериз Чпирдал, кIвалив агакьайлани зун галатнавачир. Акур- такур са лент хьиз вилерикай физвай, амма фагьумди пердедин къулухъ патан дуьня пара кьечIезвай…

Гуьлалийрин Эйваз,
Зари

Добавить комментарий

Ваш e-mail не будет опубликован.