Са хуьруьн хва тир — Ватандин хва хьана!

Кьегьалвал, итигвал, мердвал. Са-садбурун (парабурун ) мецел жеда, садбуруни чан эцигна амалдив, кардив субутда ам. Гьар Чингиз рикIел хтайла (ам рикIяй акъатзаван хьи?.) Къафкъаздин игит хва Жевгьер Дудаеван «Чиляй галчIур жез­вайбуруз цавун аршариз лув гунин бахтаварвиликай вуч хабар ава кьван!» — гафарин деринвал кьатIуда за.

2016-йисан 29-декабрдиз душмандин провокацидин вилик пад кьадай чIавуз Чингиз Къурбанова кьегьалвилелди женг чIугуна душмандин 3 аскер тергна, вични игитвилелди гьелек хьана. Адан чан аламачир тандикайни кичIезвай душмандиз. Абуру игитдин мийит дуьнядин шумуд­ни са тешкилатрин тIалабунар кваз такьуна 39 юкъуз есирда хвена. Белкини чпинбурувай алакь тийизвай ихьтин кьегьалвилин феномен чириз канзавайтIа!

Бес вуж тир Чингиз, 22 яшинда ихьтин игитвал авун адалай гьикI алакьнай? Ада 1994-йисан 23-ноябрдиз дуьнядиз вил ахъайна. Гьеле дидедиз тахьанмаз хайи Яргун «сергьятдин хуьруьз», инин юкьваллай майваяр кьабулдай пункт­ни заставадиз элкъвенвай. Гьар суваррихъ сергьят­чияр мектебдиз, кIелзавайбурни заставайриз мугьман физвай. Хуьруьн мектебдин «Хезри» тIвар алай командади «Сергьятчи» къугъунра ара датIа­на вилик чкаяр гъиликзавай. КIуьд лагьай синифдилай коман­дадин капитанвиле виридалайни цицIиди хьиз Чингиз хкягънай. Адалай кьулухъ элкъвез, «завай же­дач» -лугьуз алакьдачир…

Душмандин кьулухъ фена са шумуд офицер, 54 аскер тергна, вад сятдилай виниз душмандин хура акъвазай Азербайжандин Милли Къагьриман Мубариз Ибрагьимова вичин игитвал авурла Чингиз гьеле сад лагьай синифдиз физвай. Мубариз, «КIвалаха, стхаяр!» лагьана террористрин вилик кьил агъуз тавур Мегьамед Нурбагандов адан идеалриз элкъвенвай.Чингиза гележегдин кеспи хьизни женгинин рехъ хкягъна Бакудин Техники Университетдин оптик яракьар гьазурдай инженервилин факултет куьтягьнавай.

Ам Ватандиз хтайла вири Азербайжан къагьриман хцин кIвачел къарагъна. Икьван чIавалди са сихилдин, са хуьруьн хва тир Чингиз гила вири Азербайжандин веледдиз элкъвенвай.

КцIарин Шегьидрин хиябанда кьиле фейи тазиятда женгчийри, Милли Межлисдин депутат­ри, райондин регьберри ва агъзурралди жегьилди иштиракзавай.

Азербайжан Республикадин Президент Ил­гьам Алиева Чингиз Салманан хва Къурбановаз «Азербайжандин Милли Къагьриман» тIвар гу­нин гьакъинда серенжемдал къул эцигна.

Къурбановрин хизан – Чингизан буба, диде ва стха кьабулай уьлкведин регьберди 10 ягъидихъ галаз къуватар сад тушир женгиник экечIай, кьегьалвилелди гьелек хьайи и жегьил хвена тербия авур абуруз, гьакIни вири КцIар райондин жемятриз разивал къалурна, Азербайжандин Милли Къагьримандин тIвар тестикьарзавай документар абуруз текьдимна.

Гуьгъуьнай президентдин тапшуругъдалди шегьиддин хизандиз Бакуда 3 утагъдин кIвал, КцIар районда кIвал эцигун патал чил чара авуна, шегьердин куьчейрикай садаз, юкьван чирвилер къачур Яргундин мектебдиз адан тIвар гана.

Чингиза вичин гьунардалди Ватандиз, хайи чилиз вичин вафалувал субутна, тек са хизандик, хайи хуьруьк, райондик ваъ, вири лезгийрик такабур кутуна.

“КцIар” газетдай

Добавить комментарий

Ваш e-mail не будет опубликован.