Кьилегь Къудратан «Алверчи папаз»шиирдиз:
Кьамал кьуна сумка ацIай,
Гьикьван алвер ийида паб?..
Кьамал кьуна сумка кьацIай
Гьатда рекье,бес тушни,паб?
Лув гуз фида серятрилай,
Таможнадиз гуз тIушни,паб!
Байрам Салимован «Зи хуьр»шиирдиз:
Дуьняда ихьтин хуьр аватIа мад,
Къужахда авай Шагьдагъдин рехи…
ЧIехи шаир, мад авай туш ихьтин хуьр?
Кчан вуча, бес ТIигьиржал, бес Кьуьхуьр?..
Жуван хуьруьн тарифарун герек туш:
Им жезва махуник квай кациз туьш!
Асеф Мегьманан»Камар жеда»гъезелдиз:
Элдин девлет тарашдайбур, квел як алай
кьамар жеда,
Дишегьлийрин гъилерик куь тупIаларни цамар
жеда.
Эл маса гуз экъведайбур, кIаник жеда
куь»Мерседес»,
Патанд жеда квез эвлиян, квез герек туш
кьили-мирес…
Сажидин Саидгьасанован «Вун накь вучиз атаначир» шиирдиз:
Суал гузва вуна,шаир:
-Вун накь вучиз атаначир?
-Лап кьан чна, атанвай зун,
Вуч гуз жедай вавай, лагь тIун?..
Магьсим Магьсимован «Хуьруьз чIехид хкягъ»шиирдиз:
Магьсим стха, сес гун чна
Тек са вичихъ къуватдайдаз.
Гайи гафар фад гадарна,
Гьар вад салай ахгатдайдаз!
Азиз Мирзабегован «Етим хьана Дербент шегьер» шиирдиз:
Шаирдин гьар цIар, гьар гаф тир ширин шекер,
Ам хъфена, етим хьана чи Дербент шегьер…
Хажалатар чIугвамир на, рикIиз кьейи лакарви,
Шаирар мад хъижедайд я, Ватан кIани лакарви.
Вад агъзур йис хьайи Дербент гьазур жезва сувариз,
Чун-лезгияр алама къе кьве агъзурдал пIувариз…
Эйваз Марваран «Эрекь маса гузвайдан мани» шиирдиз:
Хкудда за ичерикай самагун,
Ният я зи хкудайди маса гун…
Хкудда за гьар майвадкай самагун,
Ам хъвайибур жедайвал чеб сад са кьун.
Эхиз тежез, цуру хъапI къвез кьирай чеб,
Зунни жедай пулар кIватIиз, лап ажеб!
Билал Адилован «Зи рикI икьван хамир вуна» шиирдиз:
Гуьлуьшан тир чIур я зи руьгь,
Ша, къалгъанар цамир вуна…
На къалгъанар цана лугьуз,
Зи руьгь хьана чIурухъан.
Кал-гамишар гьахьна лугьуз,
Захъ руьгь амач гуьлуьшан.
Владик Батманован «Зенгзава за» шиирдиз:
Раб-гъал квахьай дерзичи хьиз жезва зун,
Вун захъ галаз хъел хьайи гьар береда…
Жегьил гада, квадармир на рабни гъал,
Ярдихъ галаз акъудмир на къалмакъал.
Вакъиф Муьшкуьрви