Гуьнеш Мевланов

58Мевланов Гуьнеш Абусаидан хва 1953 йисуз КцIар райондин Ясаб хуьре дидедиз хьана. Азербайжандин Педагогикадин Институт акъалтIарна хайи хуьре ингилис чIалан муаллим кIвалахзава.

«МАРВАР»

Ватан я

Дидеди зун хайи кIвал,
И кIвалерин гьар са цал,
Цлараллай ширед ял,
Ватан я зи, Ватан я!

Аял чIавуз шехьдамаз,
Лайлаярна дидед заз.
ЧIехи авур кьебни кваз
Ватан я зи, Ватан я!

Зи кIвачери чил къаркьван,
Хер-кьацI хьана зал гьикьван.
КIвачихъ галкIай кесек, къван
Ватан я зи, Ватан я!

Хьайи чIавуз мел- мехъер,
Ийидамаз туьнт кьуьлер,
За руквадал тур гелер
Ватан я, зи Ватан я!

Цуьк ахъаяй яйлахар,
Дурру, серин булахар,
Булахрив гвай дамахар
Ватан я зи, Ватан я!

Кьакьан, рехи дагъларни,
Гуьлуьшан тир багъларни,
Къацу, къалин тамарни
Ватан я зи, Ватан я!

Самурни, Куьрни Араз
Вири сад кьван кан я заз.
Рагъ элцифдай гьуьлни кваз
Ватан я зи, Ватан я!

Са авадан уьлкве хьиз
Машгьур хьанвай дуьнядиз.
И чилер, кьиляй-кьилиз
Ватан я зи, Ватан я!

Уьмуьр гьикьван хьайитIан,
Цвагъда за, хкажна ван—
Зи рикI, иви, садни чан
Ватан я зи, Ватан я!
Ватан я зи, Ватан я!

Дидени диге

Баладин дерт кьатIана,
Килигунни вилерив.
Адан кьепIин тар кьуна,
Таза, зериф гъилерив.
Жув хайи дидед чIалал
Ширин лай-лай ттавуртIа,
Чара чIалал баладиз
Гьикьван чан-рикI авуртIан,
Диде туш ам, диде туш.

КIвализ хуьквер жигъирдал,
КIвачин гелер тахьайтIа.
ЧIехи хьайи гъенерал
Мехъер, мелер тахьайтIа.
МичIи йифиз дакIардал
Лампадин экв алачтIа.
Гьич тахьайтIа, тавунихъ
Са чIар кьван гум галачтIа,
Диге туш ам, диге туш.

Дидед вичин дидед чIал
ХуьзватIа, ам диде я.
Баладин рикI Ватандал
АлатIа, ам диге я.

Сад

Сад- Аллагь я,
адаз шерик
авайди туш.
Сад-Ватан я,
ватан дигиш
жедайди туш.
Сад-диде я,
чал алайди
адан нефес,
адан чан я.
Сад-буба я,
ам чи намус,
ам чи гъейрат,
ам виждан я.
Са, дидедин
чIал ава чаз,
чIал масан я
ам квадармир.
Са, уьмуьрдин
тай ава чаз,
ам гьич садран
акадармир.
Йифиз-юкъуз
динжвал течиз
кIвалахзавай,
гъудкьван авай
рикIни ава
чаз чи чанда.
Гьар са чIавуз
уях я рикI,
чи уьмуьрдин
даях я рикI.
Ам шуьше хьиз
хвена канда.
Сиве авайд
са мез я чи,
гафарални
са кьил канда.

Кьве кьил алай
мез галайбур
гъуьлягъар я,
чаз аканда.
Садра жезва
чун дидедиз.
Садра физва
эхиратдин
кIвал лугьудай
са дигедиз.
Са уьмуьр я
чаз авайди,
накь тарих я,
пака хиял.
Къадир чир жен
ша чаз адан,
халкьар хъуьруьн
тавурай чал.
Садбур вири
гьар куьнилай
заз вине я.
Садал сад мад
гилитIайтIа
ам пине я.
Садавайни
пине алай
пекеривди
дамах жедач.
И дуьнядал
сад тирбуруз
гьич садрани
уртах жедач !
уртах жедач!

 

Добавить комментарий

Ваш адрес email не будет опубликован. Обязательные поля помечены *