Сулейман Сулейманов

57Ахцегьрин хуьряй тир Рамидинан хва Сулейманов Сулейман 1995 -йисуз Къизилюрт шегьерда дидедиз хьана. Мектебда кIелзамаз вичихъ шиирдин цIарара къекъвей жегьилдиз иер са бахт ава, ада Дидедин чIалал, гьакIни урус чIалал иер-иер шиирар кхьизва. Интернетдай чидай и жегьилдин шиирар кIелайла ял ягъанай за. Алакъа хвена, телефондин нумра къачуна, йиф хьуниз килиг тавуна, адаз зенгнай. Са кьадар ихтилатна, адан чIалара гъавурда такьур Ахцегь нугъатдин гафар хабар кьуна, агалкьунар мурадна, «йиф хийир» лагьайла, жегьилдин рикI раханай зав.

Вав рахана, гьикьван регьят хьана заз,
Гьар са цIарцIу, чIехи лезет гана заз.
ХъуьтIуьн йифиз, цIийи гатфар гъана заз
Ви гьиссерин бегьер сагърай Сулейман.
Адан шиирар «Лезги газет» ва «ЦIийи дуьня» газетра чан хьана.
Алай вахтунда ДДУ-дин 2 лагьай курсуна кIелзавай Сулейманан туькIуьрунриз и мукьвара Махачкалада кьиле фейи Къавкъаздин шаиррин съезддал ДР-дин регьбер Рамазан Абдулатипова, Москвадин Кхьирагрин КIватIалдин кьил Сергей Филатова, шаир Максим Алимова, журналист Абдурешид Абдурешидова чIехи къимет гана.
Ваз мадни агалкьунар, Сулейман!

ЭЙВАЗ

Тфу гудач…

Шумуд инсан дуьняд винел шехьзава,
Сад мекьила, сад гишила ксузва.
Сада вичин рикIевай тIал эхзава,
Садан вилер накъваривди ацIузва.

Шумуд диде баладиз гур фу акваз,
Хана ахвар йифералди зегьметдик.
Къекъвемир дуст жув датIана тик акваз,
Сад Аллагьдин акатда вун лянетдик.

Шехьзавайдан накъвар михьа, куьмек це,
Малаикри вал гьамиша дамахрай.
Кесиб инсан кIвализ гъана хуьрек це,
Акъуда рикI намердвилин къармахрай.

Инсан, вунни гьатда белки кьарада,
Ширин дуьня туькьуьл жеда рикIиз ви.
Вазни куьмек ахквада гьа арада,
Тфу гудач, яргъи авур гъилиз ви.

Зиндан

Зи гъилери ваз парталар храда,
Аламатдин гъаларикай къизилдин.
Зи мез вавди ширин ванцел рахада,
Минет хьуй ваз куз тамир рикI жегьилдин.

Вун къекъвей чил марвар цуьквед бустан я,
За ви суьрет ашукь рикIел кхьизва.
Яр галачиз экуь дуьня зиндан я,
Муьгьуьббатдин ялавдал зун ифизва.

Вуж чилерин пачагь я?

Инсан килиг гуьрчегвилиз дуьньядин,
Цавар-дагълар, гьуьлер-чуьллер аламат.
Залан цифер, винел кьезил гьавадин,
Акъвазнава марфадив куз къурамат.

ЭкъечIзава цуьк кIеви чил кукIвариз,
ГъвечIи дувул гьуьлдандилай тIарам я.
НуькIрен манид ракъуриз багъ ахвариз,
Гуьзел гатфар адан рикIиз илгьам я.

Йифен бере, тик булахдин ширширди,
Секинвилин гъвечIи са кIус атIузва.
А ширширдай бендер лугьуз шиирдин,
Булахди чаз вичин дерди лугьузва.

Булахдин яд, белки чилин накъвар я,
Гъетер акваз, къужахда кьаз тежезвай.
Цавни чил бес агъзур йисан дустар я,
Арадавай мензил яргъаз тежезвай.

Атирдин ни къвезва гьар са бустандай,
Къизилгуьлер дамахар гваз рахазва.
Гараривай мугьман хьайи Ширвандай,
Хабарикай дуьнядавай юзазва.

Яр такурла, гевгьер хьтин

Экуьн кьиляй варз цIразва,
Алцифзава, шекер хьтин.
Марвар цуьк хьиз рикI кьуразва,
Яр такурла, гевгьер хьтин.

Шербет авай истикандай,
Хъваз ава за агъу туькьуьл.
Вун гуьзел яр патав кандай,
Амма масад хьанва ви гъуьл.

Эй кани яр, ви атирдин,
Ни, девлетрихъ дегиш жедач.
Вучиз рикIиз ашукь тирди,
Дуьньяд винел дадмиш жедач?

Ви пIузарин виртIедин дад,
Каниди заз са сир хьана.
Ви хъвер акваз, пайчагь тир шад,
Гила закай есир хьана.

Цавун хура кузвай гъетер,
Чир хьухь зи яр гьуьруь тирди!
Адан назик, чIулав вилер,
Заз квелайни экуь тирди.

Низ авурай, чанди гьарай?
Бес гьинай за акун куьмек?
Фана дуьня, туьхуьрмир цIай,
Муьгьуьббатди гузавай экв!

Я сад Аллагь, къакъатна яр,
Гьуьлдандин рикI хъуьтуьл авур.
Алцифна яд акъатна кьар,
ПIузарар зи туькьуьл авур.
И шиирди гуьрчек рангар,
Хажамжамдин, чIулав туна!
Масада ви рикIе чан яр,
Муьгьуьббатдин ялав туна!

Заз чир жезвач..

Заз чир жезвач мана руш ви гафарин,
Кьадач зун я ахъайдач ви гъилери.
Ви амалри хазва тахт зи гатфарин,
Амма заз яр лугьузва ви вилери.

Зун ахварал гьич физвач руш йифериз,
Заз чизва хьи ви рикIни яр ксанвач.
КичIе жемир заз гуьгъуьнал эвериз,
Ашкъидикай мензилди пай атIанвач.

Амма рикIе цIай твазва и мензилди,
Вун такурла дуьнядин дад ширин туш.
Жаваб це яр, вуч авурай жегьилди,
Зи шадвилин гьил кьуразва, дерин туш.

Ви мециз заз салам гуз кан хьайила,
ПIузарикай жезва адаз ракьарар.
Ашкъиди рикI, цIаю чуьл хьиз кайила,
ХъутIуьхъай заз ахквазмач мад гатфарар.

Заз чир жезвач мана руш ви гафарин,
Кьадач зун я ахъайдач ви гъилери.
Мугьман я зун ви гьар йифен ахварин,
ТуширтIа, вун кудачир гьич дердери.

Добавить комментарий

Ваш адрес email не будет опубликован.