Фикрет Хидиров

Хидиров Фикрет Алибубадин хва 1952 -йисуз Азербайжан республикадин КцIар райондин Кириг хуьре дидедиз хьана. 1967 — йисуз КцIар шегьердин интернат мектеб акьалтIарайдалай кьулухъ ам Бакудин Политехникумдик экечIна. Техникум куьтягьайдилай гуьгъуьниз Дербент шегьердиз куьч хьана ва «Радиоэлемент» тIвар алай заводда жуьреба – жуьре къуллугърал кIвалахна. Алай вахтунда ада и шегьерда уьмуьрзава.
Шиирар кхьиз Ф. Хидиров интернат мектебда кIелзавай йисарилай эгечIна. 1974 – йисалай ада КцIар шегьерда кардик квай «РикIин гаф» тIвар алай эдебиятдин кIватIалда иштракна. Сифте яз адан шиирар «Къизил Къусар» газетдин чинра чап хьана. Гуьгъуьнлай шаирдин эсерар Магьачкъалада лезги чIалал акъатзавай «Лезги газет»(«Коммунист»), «Дуствал» алманахдиз, «Литературадин Дагъустан» журналда, Азербайжан республикада лезги чIалал акъатай «Бахтавар чил» алманахда, «Чирагъ» журналда , «Самур» газетда ва маса чапдин органра акъатна.
Шаирдин са лагьай, «Зи багьа чил» тIвар алай, ктаб 2003 — йисуз Дербент шегьерда чап хьана. 2008 — йисуз «Авахь, Самур!» ктаб Магьачкъалада, 2011 — йисуз «Мугьманда » ктаб акъатна. Алай ватунда кьуд лагьай ктабдал кIвалахзава.

Эйваз

КЦIАР КЪЕ ЗАЗ ХУШ АКУНА

КцIар ватан — зи чан, зи рикI,
Хтанва зун, хьанваз гъарикI.
Ваз мугьман я, лугьун за гьикI?
Хабар кьуртIа дустари икI :
— КцIара ваз вуш акуна?
-КцIар къе заз хуш акуна.
Дуьз я, хъфин хьанва четин,
ТуштIан яргъал мензил рекьин,
Часпардини, алай кьве чин,
Къалурзава «гьунар» вичин.
Заз адав гвай «кьуш» акуна.
Амма КцIар хуш акуна.
Иер хьанва кIалуб адан, —
Акваз куьче, акваз майдан,
Аямдин я кIвалер кьакьан,
ЦIурувални амач накьан.
Гьич кьве йис кьван туш такуна,
КцIар къе заз хуш акуна.
«Пачагьдин багъ», — я халис тIвар,
Тарар ина, ама пайгар.
КIвачик хьайи хъипрепI- кIусар,
Къван туна мармардиз ухшар,
Чиле гишир – аруш акуна.
КцIар къе заз хуш акуна.
Зун фена «Беневша» вирел,
Адал ала сетка – регъел.
Патав, цийи багъда гуьзел,
Ацукьнаваз. гъилер къуьнел,
Заз гадани руш акуна.
КцIар къе заз хуш акуна.
«Къайи булах», женнет я лагь!
Аниз тефин, вич я гунагь.
Имаратар, я машаллагь,
Эцигнава пагь- пагь- пагь!..
Мугьманрин алтIуш акуна,
КцIар къе заз хуш акуна.
Хъсан хьанва шегьердин гьал,
Амма рикIи чIугуна тIал:
Лайих гафар дидед чIалал,
Акунач алай я цал, я кIвал…
Татугайвилин тIуш акуна.
ЯтIани КцIар хуш акуна.

ЧИЛ ГУМИР МАСА
Бубарилай амай чилер, кIвалер,
патанбуруз, маса гузвай са бязибуруз.

Касди, фагьум хцIи,
Уьмуьр патал вири, —
Ватан, кIвал, хзан…
Хьун паталди хъсан,
РикIе аваз хуьда,
Хьана къайгъуда,
Талукь тир вичиз,
Даим герек чилин.
Тирвиляй тIакьат са.
Чил гумир маса!
Хуьруьн, убадин,
ЧIехи бубайри,
Кутур ери – бине,
Кьуна кIанда вине!
Къведай несилдиз,
Вилин нини хьиз,
Хвена саламат,
Агакьра аманат!
Патахъандаз на,
Чил гумир маса!
…»Къураба жемир», —
ЛакIабдал къвемир…
Жеда вал къехуьн,
Куьруь жеда луькIуьн.
Гьисаба такьаз,
КIвале къариб яз.
Вил жедач ви тух.
Амукьин рикI чIух
Суза я суза,
Чил гумир маса!
Ватан – бубадин чил,
КIвал – дидедин гъил,
Хва анин иеси. —
Иесидиз веси
Авуна касди:
Ватандиз хасди
Я: чил, кIвал, ака.
Хуьх абур,бала!
Къул гумир маса,
КIвал гумир маса,
Чил гумир маса!

Добавить комментарий

Ваш адрес email не будет опубликован.