За и мукьвара «Лезги газетдай» кIелнай. Чи Шарвилияр хьтин Забит Ризвановани Байрам Селимова Советрин чIавуз «Коммунист» (гилан «Лезги Газет») газетда «Шарвили» эпосдикай са чин акъуднавай. Мад газетда акъатайди са чIукI хьанач кьван, налугьуди Магьачкъалада са бомба падна кьван. И кардик акахь тавурди амукьнавач хьи, « Я, лезгийриз эпос авач гьа!» лугьуз. КПСС-дин Дагъустандин обкомни кваз акахьна. Гьа икI, эпосдин муькуь паяр Совет амаз кьван акъуд хъувунач. Газетдиз акъатай малуматни, эхирда авай «гуьгъ ама» гаф устадри несилриз ракъурай ЧАР тир жеди. Эхь, гьар са цIийи шеъ, датIана хушдаказ кьабулдач. Гатада, ягъада, хъачда ва и цIийивал, гьахъ ятIа, мичIи-мичIерай кьуьнтинив энгеларзавайбуруз рум гуз-гуз экуьнал акъатда. Чи Шарвили эпос хьиз.
Зун гьар йисуз и суварихъ жез алахъда. И сувар дуствилин сувариз элкъвенва. Ана тек лезгийри ваъ, Дагъустандин маса халкьарини майданар туькIуьрзава. Дуьнядин гьар са пипIей лезгияр кIватI жезва.
1 августдиз къадим Ахцегьин агьалийри чпин рикI, гин, рак мугьманриз ахъайнавай. Ина цIуругуд лагьай сефер яз «Шарвили» эпосдин сувар кьиле физвай. Са шумудра и суварик хьайи заз и гъилерани иштирак ийин несиб хьана. Экуьн яралай зуьрнединни далдамдин ванери цавун чина лепе твазвай, саки чIехи чилин гьар са пипIей агатзавай мугьманриз, Шарвилидин хтулриз салам гузвай. Кусайрин, паливанрин, балкIанар чамарарзавайбурун, ашукьрин, кьуьлерзавайбурун ванер сад-садак акахьнавай. Ахцегьрин гьар кам, манидин ким тир. 
Ина Дагъустандин са шумуд халкьдин векилри, лезги райондин агьалийри чара-чара майданрал концертар гузвай. Залан путар хкажзавай къуьн алай кьегьалрин акъажунри сувариз иервал гъизвай. Ахцегьа кьиле тухузвай «Шарвили» эпосдин сувар гьакъикъатдани халкьдин рикI алай сувариз, чи лезги халкьдин чIехи ва шад межлисдиз элкъвенвай. Атанвайбур и майданрал ял ягъаз-ягъаз, КIелед хев галайнихъ рекье гьатна, 105 кIар авай гурарай Шарвилидин кIеле хьайи пелел хкаж хьана. И мярекат зун патал и сефердани чIехи аламат, ругьдин ризкьи тир.
Суварин кьилин кар В.Амирован тIварунихъ галай багъда кьиле физвай чIехи гала-концерт тир. И концерт жедалди, зунни «Алам» журналдин кьилин редактор Камран Къурбаналийрин Ахцегьрин машгьур музейдиз фена. Багъдиз хтайла чи рехъ хуьзвай жегьил шаирар агатна. Са иер чайдин столдал чна шиириатдин ким кутуна. Эвел жува лагьана, ахпа жегьилриз гаф гана. Нубатдив шиирар лагьана чна. Чав агатзавайбур пара хьана, гьавиляй чун улубрин кIвализ рекье гьатна. Ина пара хушвилив кьабулай чна, са иер «МАРВАР» дин межлис кьиле тухвана. Чи межлисда и сефер Голландияда уьмуьрзавай лезги шаир Гуьлжагьан Мисриханова, Питердай хтанвай филолог Гуьзеля Гьасанова, чи ватанэгьлияр тир шаир Фикрет Хидиров, шаир-алим А. Мирзабегов, филологиядин илимрин кандидат Халидин Элдаров, гьакIни са кьадар жегьилар, улубрин кIвалин кIвалахдарар авай. Виридан шиирриз яб гана, лезетар къачуна. КIелай эсерриз вирида чпин фикирар лагьана. Азиз муаллимди чаз «РикIин гаф» кIватIалдикай, эдебиятдин теориядикай, поэзиядикай са кьадар ихтилатна, жегьилриз меслятар гана. Зи иер дуст, жегьил шаир Ахцегь Сулеймана, Владика, Мурада, Гулфияди, Заринади чпин таза цIараривди чаз хвешивал пахшна. Хвеши тир заз, хвеши тир хьи, Владикав, Сулейманав шииррин дафтарар гвачир. Шиирар лап гьа заз кандайвал хуралай лугьузвай. Чун вири санал майдандал хтанай. Инал са шумуд агъзур инсан кIватI хьанвай. Ахцегь райондин кьил О.Абдулкеримова мярекат ахъайна, атанвайбуруз сувар мубаракна. Концертда чи сейли манидарри манияр лагьана. ГьакIни и суварин оргкомитетдин кьил Дербентдин мер (виликан) И.Яралиева адет тирвал чи халкьдин са шумуд баракалла векилдиз «Шарвилидин» премияяр гана.
Эйваз Гуьлалийрин,
Зари