Ахцегьиз кьве сефер

Са шумуд йисар я, зунни Камран чIавиниз килиг тавуна Ахцегьиз Шарвилидин суварик физва. Алатай йисан 25 июлдиз Ахцегьа нупадин мярекат кьиле фена. Чун экуьн яралай Ахцегьа авай.

Багърияр акуна, ихтилатарна, музейра, майданрал хьана, манийриз яб акална, тIем кьабулна. ГьакIни адет тирвал, улубрин кIвале шиирдин ким кутада. И сеферда «Марвардинни», «Булахдин» векилар санал кIватI хьанвай. Гуьзеля Гасанова, Нариман Ибрагьимов, Куругъли Ферзалиев, Дилмира Ашурбегова, Гулфия Пиругъланова, Низам Гасанов, Сейфудин Шагьбазов, Владик Батмананов, улубрин кIвалин кIвалахдарар санал агатна. Са иер шиирдин межлис кьиле тухванай. Санал агатай кIватIалрин векилри сада-садаз чпин улубар, журналар, алманахар бахшна. Зун гьар сефер и мярекатдай хтайла са шумуд юкъуз и суварин таъсирдихъ кумукьда.

В. Амирован тIварцик галай паркуна кьиле фидай чIехи концертдал кьван вахт амай. Чна чи сейли Ашукь Шемшир алай Докъузпара райондин майдандин патав акъвазна адахъ яб акалзавай. И чIавуз чун Ахцегь райондин кьил Абдулкеримов Осман муаллимдал дуьшуьш хьана. Пара хушвилелди рахунар кьиле фена. Хайи чIалал, поэзиядал рикI алай Осман Магьмудовича вичи «АЛАМ» журнал датIана кIелзавайди, «МАРВАР» кIваталдин къени крарикай хабар тирди чирна. ГьакIни чаз Ахцегьиз эвер гана. Вични и гаф атана-фейи рахун туширди тикрар хъувуна.

Гьа икI чна Осман стхадиз гаф гана. Бакуда кьиле фейи «Марвардин» межлисда чна и кардикай ихтилатарна.

«Ахцегьиз рекье гьатна. Зерифа Къасумова, Камран Къурбаналийрин, Абир ЭчIехви, Бести Нифтиева, Магьира Ширинова ва зун-Эйваз Гуьлалийрин ЦIехуьла авай таможнадилай алатна. Инал чи журналдин чIехи дуст, зи мукьва-кьили тир текиви Барис тхади чи рехъ виливди хуьз­вай…

Райондин Културадин кIвалин чIехи залда шиирдинни манидин межлис кьиле тухвана. И югъ гьакIни Дагъустандин културадинни чIаларин сувар тир.

Райондин регьбер Осман Абдулкеримован патай и сувар чаз мубарак авуналди, межлис Ахцегь райондин кьилин мавин Алмас Шуаева ахъай­на.

«МАРВАРвийрихъ» галаз санал чкадин шаирар тир Ахцегь Сулеймана, Куругъли Ферзалиева, Жамиля Саидовади, Лга Энвера, чепиви рехи кас Элдар Адилхановани чпин эсерар кIелна, райондин културадин кIвалин кIвалахдарри манияр лагьана.

«МАРВАРди» вичин нубатдин кам вегьена, Ахцегьвийрин рикIера амукьдай са мярекат кьиле тухвана, багърийриз рикIерин цIай, ифин бахшна.

Эхирдай Камран муаллимди Ахцегьа чаз ихьтин межлис кьиле тухуз теклифай, чка гайи ра­йон­дин регьбер Осман Абдулкеримоваз, куь­ме­- кар гайи, чи гъил кьур « Дагъустан-Азербайжан дуствилин жемиятдин» президент Абдулкъафар Исаковичаз, текиви Барис тхадиз, гьакIни иштиракай жемятдиз сагърай лагьана, вичихъ галаз Бакудай гъанвай ктабар ва журналар улубрин кIвализ бахшна.

Чаз амукьдай чка, кIвал теклифзавайбур пара тиртIани чун зи бубадин халадин хва Барис тхадиз илифна. Дагъларин элкъвей рекьерай чун Текидал агакьна. Къелем свасани Жамисер ваха тавдин кIвале чIехи суфра ахъайнавай. Дагъларин серинвилин фул гьатнавай чун цIай авай кIва­ле ацукьна. Са арадилай хуьруьн интелигентар, шииррал рикI алай ксар, ярар дустарни агатна, манидинни шиирдин ким давам хъхьана.

Экуьн яралай за ТекипIир хуьруьн сурариз фена, багърияр зияратна, ПIир Гьасан бубадал кьил чIугуна, дуьаяр авуна.

Гьава хуш тир. Ракъини вичин нурар дагъларин, рагарин чинриз ягъазавай.Чун Усугъдал эвечIна. Чи фикирда фидай чкаяр авай. Амма виридав агакьнач. Вини Крарин хуьруьз фена, анин пелерал хкаж жез алакьна чалай.

Рекьери галуднавайтIани рикIе, кьиле са ван амай: — вуч хъсан я, хайибурун юкьва. Хайи чIалал шиир кхьин, шиир лугьун рикIивайни чIехи бахт я кьван. Аллагь, и бахт завай къакъудмир.

Гуьлалийрин Эйваз

Добавить комментарий

Ваш e-mail не будет опубликован.