Гьар са инсанди вичин кьисметдин пай яшамишзава. Ахьтин инсанарни ава хьи, вичин уьмуьрдилай алава чара кьисметризни шерик акъатзава, гагь хъуьрезва, гагь ишезва, садра къагьриман я, муькьу вядеда ламатI къилихар винел акъатзава…
И инсанар дегь сенятрикай тир-актёрвилин сагьибар я. Жуван кьилди уьмуьрда секин, мили хесетрин сагьиб тир Багъир Агьмедов сегьнеда жилдинай-жилдиниз, ролунай-ролуниз гьахьуналди цIудралди сад-садаз акси хесетар, образар яратмишнава. Им вич Аллагьди тIимил инсанриз бахшзавай талант я…
Чи макъаладин къагьримандин ихьтин алакьунар гъвечIи береда- ада гьеле шегьердин 1-нумрадин мектебда чирвилер къачудай чIавуз винел акъатна. Мектебдин драмкружокдин виридалай актив иштиракчи тир Багъиран цицIивал, гафунихъ экъвен тавун, ванцелди, гъилерин гьерекатралди ва чинин мимикайралдини тамашачи вичел желб авун зурба талант тирди гзафбуру кьатIанвай…
Нагьахъдай лагьанвач хьи, мурад гьинихъ ятIа, мензилни гьанихъ я. Багъир Агьмедов 1992-йисуз ашкъидив, гьевесдив цIийиз яратмишнавай КцIарин Девлетдин Лезги Драм- театрдиз атана. Алатай йисара талантлу актерди ина цIудалай виниз рикIел аламукьдай образар ярятмишнава. Абурукай сашумуд къейд авуртIа, Багъир Агьмедован яратмишунрин диапазон квевайни кьатIиз жеда: Мешеди Ибад (Уьзейир Гьажибегов-«Ам тахьурай, атIад хьурай»), Керимов (Сабит Регьман- «Мехъер»), Кас (Элчин Эфендиев-«Зи гъуьл дилиди я»), Эмир (Тамара Велиева-«Зи лацу лиф»), Мухтар (Мирзали Рустамов- «Кесиб ятIа рекьимир»), Шамил (Мирзали Рустамов- «Сефербеган мехъер»).
2011-йисалай театрда режиссер хьизни кIвалахзавай Багъир Агьмедова Сабит Регьманан «Мехъер» ва «Гьижран», Эли Эмирлидин «ЦIуру кIвал», Асеф Мегьманан «Харубегни-ЦIарубег» тамашайриз сегьнеди уьмуьр ганва.
Алатай йисан эхирра Бакуда кьиле фейи «2+1» экспериментал театрдин фестивалда Багъир Агьмедова сегьнедин къурулуш гайи «Рекьик зун, зи каниди» (Азиз Несин) тамашади 26 театрдин арада 5- чка кьуна ва режиссер хьиз бахшишдиз лайих акуна.
Багъир Агьмедов тек са актер, режиссер туш. Адахъ сенятдин гзаф хилера талант ава. Кефер патан зонада кьиле физвай конкурсриз эксперт хьиз илифзавай ада сегьнедин, музыкадин, операторвилин хилера алакьунар авай жегьилар арадал акъудунихъ зурба пай кутазва.
И мукьвара адаз хару сенят вилик тухунин карда агалкьунриз килигна Азербайжан Республикадин Културадин ми- нистерстводин къарардалди «Културадин лайихлу кIвалахдар» хурун лишан ганва. Чна Багъир стха рикIин сидкьидай барка ийизва ва адаз мадни кьакьан кукIушар рам авун мурадзава.
Жавид ТАГЬИРОВ,
КцIар шегьер