Зун са югъ вилик ДАГЪЛАРИЗ илифна, вацран садаз. Зи халуйрин хуьре, пак тир Текидал йифна, багърийрал кьил чIугуна, йифен кьуларалди ихтилатиз йиф чIичIна. Экуьн яралай Миграгъа МАРВАР булахдиз салам гана, са капаш рикIелай алахна, Ахцегьиз рекье гьатна. Марвар булах, КIелетрин къаншарда, Миграгъай Текидал фидай рекьин чапла пата гуьнедин хурал ала.
Усугъал АЛАМВИЙРИН рехъ хвена, санал Туридин суьгьуьрдиз гьахьна чун. Зуьрнедин, манидин ванцIи, кусайрин, паливанрин ванери цавун чина лепе твазвай. Ахцегьин гьар кам манидин ким тир. Ина Дагъустандин са шумуд халкьдин векилри, лезги районрин агьалийри чара-чара мягьлейра концертар гузвай.
Ярар-дустар акуна, гьикьван рикIиз хуш жеда багърийрин арада. Ахцегьрин машгьур музейда хьана, куьчейра экъвена. Чавай гьахьдамаз пул къачур кIвалахдарри, са герендилай чав пул вахкана, чпин гьуьрмет, къайгъу къалуриз алахъна.
Улубрин кIвале «МАРВАР» кьиле тухвана. Эхь «МАРВАРдин» межлис! Чаз интернетдай чидай жегьилриз чун илифна. Гулфиядин дагъларин, ятарин, цуькверин атир квай, иер, регъуь-кичIе цIарариз, Марселан руьгь юзурдай, зи МЕРД ЗАРИ Владикан чразвай шиириз яб гана. Зани шиирар лагьана. ТупIалайна, анализна, чи фикирар, меслятар гана. Вуч хъсан я чаз хайи чIалал ШИИР КХЬИЗВАЙ жегьилар ава. Са шумуд журналистди иштирак авур межлис виридан рикIяй хьана. Чи играми журналист Гуьлера Камиловади вичин разивал, хвешивал малумарна. Литература вилик фин патал ихьтин кружокар хьун герек тирди лагьана. Чна чи са шумуд сейли шаирдиз Дербентда, Махачкъалада шиирдин, литературадин межлисар, кружокар тешкилун теклифна. Вирида хушдаказ кьабулна, са стхади чпин районда авайди малумарна. Бес и жегьилар вучиз авач лагьайла, абур чи райондай туш лагьана зи пагь атIана. Аллагьди хуьрай чан ЖЕГЬИЛАР, куьн вири зи хуьруьнвиярни, район- виярни, рикIинвиярни я. Шиир кхьин бахт я, хайи чIалал кхьин лап чIехи бахт я. Кхьихь, кIела, кIела, мад кIела, кхьихь!
ЧIехи мярекат Советрин Союздин Игид Валентин Эмирован тIваринихъ галай паркуна тешкилнавай. Ина гала концерт кьиле фена, Дербент шегьердин крар кьилиз акъуддай гьакуматдин чIехид тир Имам Яралиева Шарвилидин цIувад лагьай суварин лауреатриз Шарвилидин тIваринихъ галай премияяр гана. Милли журналистика вилик тухунай, Бакуда акъатзавай «АЛАМ» журналдин кьилин редактор Камран Къурбаналийрин, шаир-алим Азиз Мирзабегов, Дагъустандин халкьдин шаир Ханбиче Хаметова, «Лезги газетдин» кьилин редактор Агъарза Саидов алай йисан лауреатар хьана. Виридаз мубарак хьурай.
Эйваз Гуьлайлийрин,
”АЛАМ“дин къеневай “Марвар” литератур кIватIалдин кьил, зари