«Абилейсан Марфни» «Чешне»

 
7-апрелдиз Махачкъалада республикадин Милли улубрин кIвале алай аямдин лезги литературадин алакьунар авай векилрин — Фейзудин Нагъиеван “Абилейсан марф”, “Три песни” (“Пуд мани”) ва Пакизат Фатуллаевадин “Чешне” ктабрин презентация кьиле фена.

Мярекат улубрин кIвалин кIвалахдар ахцегьвидин руш Секинат Мусаевади ахъайна ва шииратдин межлис давамарун патал гаф филологиядин илимрин доктор Гьаким Къурбаназ гана.
— Абур кьведни чи литературадиз са йисара атана ва гьар садалай шииратда вичин кьетен рехъ арадал гъиз алакьнавай зарияр я… Алатай йисан эхиррай абуру лезги литературадин суфрадал хъсан, метлеб квай ктабар гъанва лагьана ада.
Ф.Нагъиевани П.Фатуллаевади чпин эсерар кIелайдалай кьулухъ, микрофондихъ абурун ктабрикай фикирар лугьуз шаирар, писателар, обществодин деятелар, журналистар, маълимар экъечIна. Абурун жергеда Бакуда акъатзавай “Алам” журналдин кьилин редактор Камран Къурбаналиев, Дагъустандин медакадемиядин доцент Азедин Эсетов, шаир Саират Агьмедпашаева, тарихдин илимрин кандидат, профессор Аскерали Аскералиев, табасаранрин шаир Шагьвелед Шагьмарданов, Дагъустандин халкьдин писател Абдуселим Исмаилов, “Дагъустан” РГВК-дин кIвалахдарар тир Гуьлера Камилова, Исамудин Агьмедов, филологиядин илимрин кандидат, доцент Агьмед Агьмедов, “Шарвили” операдин либреттодин кирам Имара Багъирова, филологиядин илимрин кандидат Халидин Элдаров, шаир Фазил Асланов, “Къурушрин сес” газетдин кьилин редактор, “Лезги газетдин” мухбир Муса Агьмедов ва масабур авай.
Кьилди къачуртIа П.Фатуллаевадин “Чешне” ктабдикай рахадайла К.Къурбаналиева къейдна:
— … «Ктабдин структур тIварцIиз кутугайди я. Шаирди аник жуьреба-жуьре эсерар кутуналди, хейлин жанрайринни формайрин чешнеяр къалурнава. Мисал яз, ктабда гъезелар, къошмаяр, герайлыяр, новеллаяр, очеркар, таржумаяр… гьатнава. Вирибурукай инал рахаз хьун мумкин туш. Заз “Яр” тIвар алай гъезелдикай кьве гаф лугьуз канзава. Чаз виридаз малум тирвал, лезги литературада ярдикай кхьан тавунвай зари тек тек ава. Чи чIала “яр” гафунихъ са шумуд мана хьуни, П.Фатуллаевадин шиирда и гафунин вири манаяр-метлебар къалуриз алахънава. Шаирди чIалан девлетдикай гзаф менфят къачузвайвиляй кIелзавайдан гьевес мадни хкажзава»…
“Пакизат Фатуллаева алакьунар авай шаир тирди чаз виридаз чизва. Эгер литературада ам къени шииратдалди гзафбуруз чешне ятIа, уьмуьрда, гьар йикъан яшайишда ам дагъви дишегьлидиз хас вири къилихралди амай вири дишегь- лийриз чешне я.
Бязи дуьшуьшра са шаирдихъ агалкьун хьайила, гзафбуру сада-садавай “ам вуж я?, ам гьинай я?” лугьуз, хабарар кьада. Ф.Нагъиевакай рахайтIа, ам лезги халкьдин гимндиз элкъвенвай “Сагъ я лезги халкь” шиирдалди къе гьар са хзандиз, гьар са хуьруьз таниш я. Зи мурад куьн мадни чIехи дережайрив агакьун я”, — лагьана М.Агьмедова.
Къейд авун лазим я, алай йисуз Дагъустандин А.А.Тахо-Годидин тIварунихъ галай педагогикадин илимдинни жагъуру- нардай институтди Ф.Нагъиеван “Зенг ва къван” ктаб госпремия гун патал къалурнава. Презентациядин хейлин иштиракчийрини и кардин пад хвена.

 
Мярекат чIагъанни галаз лезгийрин машгьур манидар Керим Камилова, ашукь Алихана тамамарай манийри, Махачкъала шегьердин 38-нумрадин гимназияда лезги чIаланни литературадин маълим Гьалимат Бала- мирзоевадин гъилик чирвилер къачузвай аялри фасагьатдиз кIелай шиирри мадни къени авуна.

Мегьамед И.

 

Добавить комментарий

Ваш адрес email не будет опубликован.